- Gobernu-taldeak Agintaldi Plan honekin herritarrei proiektu hauen betetze-mailaren berri emateko konpromisoa hartu du
- Gure hiribilduko alkate Alfonso San Vicenteren hitzetan: “Lan egiteko gure konpromiso gardena berresten dugu, eta, horregatik, 2027ra arteko gure agintaldia gidatuko duen ibilbide-orria jendaurrean jarri dugu”
Agintaldi Plana hemen ikus dezakezu
Gure Udalak 2023-2027 Agintaldi Plana aurkeztu du, eta gobernu-taldeak dokumentu horretan jasotzen diren 56 proiektu estrategiko betetzeko konpromisoa hartu du hurrengo 4 urteetan. “Lan egiteko gure konpromiso gardena berresten dugu, eta, horregatik, 2027ra arteko gure agintaldia gidatuko duen ibilbide-orria jendaurrean jarri dugu. Bertan, azken urteetako paralisi instituzionalaren ostean, Balmaseda suspertzeko proiektuak bildu ditugu. Proiektuak honako ardatz hauetan sailkatu ditugu: ‘Pertsonak’ (16 proiektu), ‘Aukerak’ (9 proiektu), ‘Iraunkortasuna, irisgarritasuna eta segurtasuna’ (12 proiektu), ‘Kultura eta nortasuna’ (7 proiektu) eta ‘Udal moderno, hurbil eta arduratsua’ (12 proiektu)”; horixe adierazi du Alfonso San Vicentek, gure alkateak. Halaber, alkateak azpimarratu du gobernu-taldeak Plana gardentasunarekin gauzatuko duela: “Erantzukizun, konpromiso eta gardentasun ariketa batean, herritarrei proiektu bakoitzaren betetze-mailari buruzko informazioa emango diegu. Gure webgunean atal bat irekiko dugu azaldutako proiektuen betetze-maila kontsultatzeko. Bestalde, aldizka batzarrak antolatuko ditugu jendea informatzeko”.
Hartutako 56 konpromisoak hiribilduaren eta herritarren beharrekin bat datoz, baita NBEk bere 2030 Agendan azaldutako Garapen Jasangarrirako Helburuekin ere; gainera, ‘Hizkuntza eta Kultura Aniztasuna’ helburu berria ere jasotzen du.
‘Pertsonak’ kapituluari dagokionez, 16 proiektu betetzeko konpromisoa hartu dugu, besteak beste Immigrazioko Zerbitzu Teknikoa berreskuratzea, igerilekuen birgaitze integrala edo gazteentzako etxebizitzak eraikitzea. Modu berean, Udala V. Berdintasun Plana prestatzen ari da, Ahalduntze Eskola sortuko du, adinekoei zuzendutako jarduera-programa bat diseinatu eta gauzatuko du eta aldizkako bisitak egingo ditu egoitzetara pertsona horien premiak ezagutzeko, lankidetza-hitzarmena sinatuko du Caritasekin premia bereziko gizarte-beharrei erantzuteko, osasun-arloko prebentzio-kanpainak egingo ditu, Udalaren kirol-instalazioak hobetuko ditu, bi padel-pista eraikiko ditu, Udalaren kirol-eskaintza handituko du, kirol egokitua sustatuko du, kirol-elkarte eta -klubei lagunduko die, jolasgune inklusiboak sortuko ditu eta, azkenik, laguntzak eskainiko ditu Balmasedako familiek eskola-materiala eros dezaten.
Agintaldi Planak herritarrei ‘Aukera’ berriak eskaintzen dizkie, 9 hain zuzen ere, hezkuntza eta enpleguaren kapituluaren barnean. Nabarmenenen artean, honako hauek daude: informatikaren eta komunikabideen adarrean heziketa-eskaintza berria izatea, arlo horretan sortzen ari diren lan-aukerak kontuan hartuta; Eusko Jaurlaritzako Hezkuntza Sailarekin batera lan egitea Hedegile kaleko 42. zenbakiko eraikina lanbide-heziketa publikoko zentro gisa birgaitzeko; enpresa berrien sorrera sustatzea tutoretza- eta aholkularitza-zerbitzua eskainiz, eta laneratzeko enpresa bat bultzatzearen bideragarritasuna aztertzea. Gainera, gobernu-taldeak nekazaritzaren, industriaren eta basogintzaren arloetan ekonomia zirkularraren aldeko apustua egingo du, enplegu-planak antolatuko ditu, gazteak lan-munduan txertatzeko ekintzak gauzatuko ditu, merkataritza eta ostalaritzaren digitalizazioa bultzatuko du eta enpresen arteko lankidetza sustatuko du.
Hirigintza eta ingurumenaren atalean, ‘Iraunkortasuna, irisgarritasuna eta segurtasuna’ izenekoan, azpimarratzekoak dira trenbide-pasaguneak kentzea, pistak eta landa-bideak konpontzea eta auzoetako irisgarritasuna eta seinaleztapena, zoladura eta bide-argiztapena hobetzea. Lerro horretan, gobernu-taldeak birziklapen-tasa handitzeko lan egingo du, energia berriztagarrien garapena bultzatuko du, Cadagua ibaiaren inguruan aisialdirako eremu bat sortuko du, basoak basoberrituko ditu, segurtasun-kamera berriak instalatuko ditu herritarren segurtasunerako, suteen prebentzioa landuko du, aparkaleku berriak sortuko ditu eta pilotalekuaren ondoan dagoen jolasgunea estaliko du. Aldi berean, gobernu-taldeak Santo Domingo eta Trascorrales auzoetan espazio publikoaren irisgarritasuna hobetuko duten konponbideak eskainiko ditu.
Era berean, ‘Kultura eta nortasuna’ arloan, Udaletik 7 proiektu garatzeko konpromisoa hartu dugu. Nagusiki euskararen erabilera sustatuko dugu, ‘Euskara Eguna’ berreskuratuko dugu, Gazteluko Muinoaren balioa nabarmenduko dugu eta Horkasitas Jauregia birgaitzeko lanak amaituko ditugu. Gainera, euskal kulturaren presentzia sustatuko dugu hiribilduan, berdeguneak egiteko lursailak erosiko ditugu eta gure ondare materiala eta immateriala zainduko ditugu.
Azkenik, gobernu-taldeak udal-zerbitzuak errazteko lan egingo du ‘Udal moderno, hurbil eta arduratsua’ arloan hartutako konpromisoekin, hala nola urtero partaidetza bidezko aurrekontuak planteatzea. Era berean, udaleko osoko bilkurak streaming bidez zuzenean ematen dira jada, webgunean gardentasun-atal berri bat sortuko da, entzute aktiboa erabiliko dugu gobernagarritasun-tresna gisa, herritarren eskaerei eta kontsultei bizkorrago eta zuzenago erantzuteko lan egingo dugu, izapideak erraztuko ditugu intuitiboagoak egiteko, laguntza digitalerako zerbitzua emango dugu, adinekoentzat bereziki, profil teknikoko plaza berriak sortuko ditugu Udalean, udal-titulartasuneko eraikinak birgaituko ditugu (Kultur Etxea, pilotalekua, Klaret Antzokia…), Udaltzaingoaren bulegoen kokalekua aldatuko dugu Magdalena pasealekuko 2. zenbakiko etxabera eta udal-baliabideak optimizatuko ditugu, dirulaguntzak ematean eta kontratuak kudeatzean kontrola handitzeko.
