- > Castellano
Balmasedako Udalak, jai-batzordearekin adostu ondoren eta osasun-agintaritzen gomendioei jarraikiz, 2020ko San Severino jaiak bertan behera uztea erabaki du, COVID‑19ak eragindako egoera larria dela eta. Jaien gainetik guztion osasuna dago, eta, beraz, zentzuz eta erantzukizunez jokatu behar dugu, pandemia geldiarazi ahal izateko.
Balmasedako Udalak, bere aldetik, gogorarazi nahi du urriaren 23an ezingo direla putxerak prestatu bide publikoan, horretarako baimena duten ostalaritza-establezimenduen kasuan izan ezik. Era berean, ezingo da kalean bazkaldu. Egun horretan, Udaltzaingoaren eta Ertzaintzaren presentzia indartuko da. Halaber, gogorarazten dizuegu abuztuaren 19ko EHAAn jasotako neurriek indarrean jarraitzen dutela. Neurri horiek establezimendu, ostalaritza, jatetxe, txoko, gazteen lokal eta sozietate gastronomikoei eragiten diete.
Jai-batzordearen azken bileraren ondoren, Udalean ordezkaritza duten talde politiko guztiek, elkarteek, kirol-klubek, txoko gastronomikoek, ostalari eta mekatariek, hezkuntza-zentroek, pentsiodunek eta erretiratuek honako mezu hau helarazi nahi diegu herritar guztiei:
Putxerak
Aurten balmasedarrok ez dugu inolako jairik egingo San Severino egunean. Hori dela eta, eskatzen dugu urriaren 23an jai-adierazpen publiko edo pribaturik eta jaia ospatzera eta jendea pilatzera eraman dezaketen ekintza edo jarduerarik ez egiteko. Erantzukizun kolektiboa izan behar dugu eta modu eredugarrian jokatu, Kolitzarako igoeran eta Karmengo Jaietan egin dugun bezalaxe. Konponbidearen parte izaten saiatu behar dugu, ez arazoaren parte; izan ere, egoera honek osasun-, afektibitate- eta ekonomia-ondorio larriak izan ditzake, hala guretzat nola gure ingurukoentzat.
Gazteei bereziki eskatu nahi diegu ahalegina egin dezatela erantzukizun handiagoz jokatzeko. Kontuan izan behar dute guztion osasuna eta bizia daudela arriskuan eta, jokabide arduratsuen bidez, eredu izan eta gizarte-konpromisoa erakutsi behar dute. Badakigu hala egingo dutela, zalantzarik gabe.
Egun horretan beste herri batzuetatik gurekin bazkaltzera etortzen zaretenei eskatzen dizuegu aurten ez etortzeko Balmasedara. Hurrengo urtean besoak zabalik hartuko zaituztegu, jaiak ospatzeko eta denok batera bazkatzeko.
Espero dugu hurrengo urteko jaietan ospakizun bikoitza egin ahal izatea eta denok elkarrekin egoteko aukera edukitzea, inoiz baino gehiago. Etorriko dira garai hobeak, baina orain beste lehentasun batzuk ditugu: gure helduen, haurren eta, azken batean, herritar guztien segurtasuna eta osasuna zaintzea.
Hala izatea espero dugu. Eskerrik asko, aldez aurretik, zuen laguntzagatik.
Aurten ez!
Eskerrik asko
BALMASEDAKO JAI BATZORDEA
Atxikitatutako elkarte eta talde zerrenda:
EAJ -PNV
EH Bildu Balmaseda
CLI
PSE Balmaseda
Ostebal
Balmasedako Txosnagune
Txoko Yemaya
Txoko Aike
Errotarin Konpartsa
Txoko Gaulle
Txoko Erdi Aroa
Txoko Kolitza
Orexinal
Cofradía de la Putxera
Asociación Vía Crucis Viviente
Procesión Infantil La Magdalena
ÑKU
Procesión Sto Domingo
Clinexxi
Balmaberria Teatro
Balmaseda1937
Colectivo pensionistas
Coral Kolitza
Burrunbada batukada
Comisión de fiestas San Ignacio
Foto skylight
Jatorrak txistu taldea
Balmaseda FC
Eguzki Dantza Taldea
CB Balmaseda (Baloncesto)
Taekwondo
Gimnasia rítmica
Sociedad pelotazale Balmaseda
Sociedad Ciclista Balmaseda
Motoclub Kolitza
Balmadenda
Bapore atelier
Hamaika Kolore Gazte Elkartea
